Psa 40 | Geez | STEP | ብፁዕ ፡ ዘይሌቡ ፡ ላዕለ ፡ ነዳይ ፡ ወምስኪን ፤ እምዕለት ፡ እኪተ ፡ ያድኅኖ ፡ እግዚአብሔር ።

Psalms 40

ፍጻሜ ፡ መዝሙር ፡ ዘዳዊት ።
1 ብፁዕ ፡ ዘይሌቡ ፡ ላዕለ ፡ ነዳይ ፡ ወምስኪን ፤
እምዕለት ፡ እኪተ ፡ ያድኅኖ ፡ እግዚአብሔር ።
2 እግዚአብሔር ፡ ያዐቅቦ ፡ ወያሐይዎ ፡ ወያበጽዖ ፡ ዲበ ፡ ምድር ፤
ወኢያገብኦ ፡ ውስተ ፡ እደ ፡ ጸላኢሁ ።
3 እግዚአብሔር ፡ ይረድኦ ፡ ውስተ ፡ ዐራተ ፡ ሕማሙ ፤
ወይመይጥ ፡ ሎቱ ፡ ኵሎ ፡ ምስካቤሁ ፡ እምደዌሁ ።
4 አንሰ ፡ እቤ ፡ እግዚኦ ፡ ተሣሀለኒ ፤
ወስረይ ፡ ላቲ ፡ ለነፍስየ ፡ እስመ ፡ አበስኩ ፡ ለከ ።
5 ጸላእትየሰ ፡ እኩየ ፡ ይቤሉ ፡ ላዕሌየ ፤
ማእዜ ፡ ይመውት ፡ ወይሰዐር ፡ ስሙ ።
6 ወይባእ ፡ ወይርአይ ፡ ዘከንቶ ፡ ይነብብ ፡
ልቡ ፡ አስተጋብአ ፡ ኃጢአተ ፡ ላዕሌሁ ፤
7 ይወፅእ ፡ አፍአ ፡ ወይትናገር ።
8 ወየኀብር ፡ ላዕሌየ ፡ ወይትቃጸቡኒ ፡ ኵሎሙ ፡ ጸላእትየ ፤
ወይመክሩ ፡ እኩየ ፡ ላዕሌየ ፤
9 ነገረ ፡ ጌጋየ ፡ አውፅኡ ፡ ላዕሌየ ፤
ዘኖመሰ ፡ ኢይነቅህኑ ፡ እንከ ።
10 ብእሴ ፡ ሰላምየ ፡ ዘኪያሁ ፡ እትአመን ፡
ዘይሴስይ ፡ እክልየ ፤ አንሥአ ፡ ሰኰናሁ ፡ ላዕሌየ ።
11 እንተ ፡ እግዚኦ ፡ ተሣሀለኒ ፡ ወአንሥአኒ ፡ እፍድዮሙ ።
12 ወበእንተዝ ፡ አእመርኩ ፡ ከመ ፡ ሠመርከኒ ፤
ወኢተፈሥሑ ፡ ጸላእትየ ፡ ላዕሌየ ።
13 ወሊተሰ ፡ በእንተ ፡ የዋሀትየ ፡ ተወከፍከኒ ፤
ወአጽናዕከኒ ፡ ቅድሜከ ፡ ለዓለም ።
14 ይትባረክ ፡ እግዚአብሔር ፡ አምላከ ፡ እስራኤል ፡
እምይእዜ ፡ ወእስከ ፡ ለዓለም ፤ ለይኩን ፡ ለይኩን ።